1 ga Oktoba: Gwamna Ya Ba Matasa Shawara kan Shirya Zanga Zanga

• Gwamnatin Adamawa ta yi kira ga mutanen jihar da ka da su shiga zanga-zangar da aka shirya gudanarwana ranar 1 ga watan Oktoban 2024
• Babban mai ba gwamnan jihar shawara na musamman kan zaman lafiya da tsaro ya buƙaci iyaye da ka da su bari ƴaƴansu su shiga zanga-zangar
• Ahmed Lawan ya bayyana cewa jihar ba ta taɓa amfana daga zanga-zangar da aka taɓa yi a baya ba

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Adamawa - Gwamnatin Adamawa ƙarƙashin jagorancin Gwamna Ahmadu Fintiri, ta yi kira ga al'ummar jihar da ka da su shiga zanga-zangar da aka shirya ranar, 1 ga watan Oktoban 2024.

Gwamnatin ta buƙaci al'ummar jihar musamman matasa da ka da su shiga zanga-zangar wacce aka shirya gudanarwa.

Kara karanta wannan

"Na shirya rantsewa da Alƙur'ani ban taɓa satar ko kwabo ba," Tsohon gwamna El Rufai

Babban mai ba gwamna Ahmadu Fintiri shawara na musamman kan zaman lafiya da tsaro, Ahmed Lawan ya yi wannan kiran, cewar rahoton jaridar Tribune.

Meyasa gwamnati ba ta son a yi zanga-zanga?

A cikin wata sanarwa da ya fitar, ya bayyana cewa Adamawa ta samu zaman lafiya kuma ganganci ne duk wani mai kishin ƙasa ya yi tunanin cewa zai fito zanga-zanga, rahoton jaridar The Guardian ya tabbatar.

Ahmed Lawan, wanda ya ce jihar Adamawa ba za ta shiga zanga-zangar ba, ya ƙara da cewa jihar ba ta taɓa samun wani amfani ba daga zanga-zangar da aka taɓa yi a baya.

Ya bayyana cewa bai kamata a kawo naƙasu ga manyan ayyukan ci gaba da gwamnatin jihar ke yi saboda zanga-zangar ba.

"Muna kira ga iyaye, ƙungiyiyon addini da su ba ƴaƴansu da mabiyansu shawara ka da su fito zanga-zangar wacce wasu da ba a san ko su wanene ba suka shirya."

Kara karanta wannan

1 ga Oktoba: Kotu ta yanke hukunci kan zanga zangar da ake shirin yi, ta jero wurare 4

"Ya kamata duk wani mai kishin ƙasa nagari yayi watsi da shirin masu zanga-zangar waɗanda ba a san ko su wanene ba."

- Ahmed Lawan

Ƴan sanda sun yi gargaɗi kan zanga-zanga

A wani labarin kuma, kun ji cewa rundunar ƴan sandan jihar Kano ta gargadi masu shirin gudanar da zanga-zanga a ranar 1 ga watan Oktoba, 2024.

Rundunar ta ja kunnen masu shirin fita kan tituna da cewa ba za ta lamunci karya doka da oda da sunan zanga-zangar tsadar rayuwa ba.

Muhammad Malumfashi, babban edita a sashen Hausa na Legit ya duba labarin.

Asali: Legit.ng