Gwamna Ya Bayyana Gaskiya kan Jita Jitar Yana Shirin Sauya Sheƙa Daga PDP

• Gwamna Siminalayi Fubara na jihar Ribas ya tabbatar da cewa yana nan daram a matsayin ɗan jam'iyyar PDP kuma ba shi da shirin sauya sheka
• Fubara ya bayyana hakan ne yayin da ya karɓi bakuncin tawagar kwamitin amintattun PDP karkashin jagorancin Adolphus Wabara
• Wannan dai na zuwa ne a lokacin da ake yaɗa jita-jitar gwamnan na shirin sauya sheƙa daga PDP saboda rigingimun da suka addabe ta a Ribas

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Jihar Rivers - Gwamnan jihar Ribas, Sir Siminalayi Fubara ya bayyana cewa yana nan daram a matsayin ɗan jam'iyyar PDP.

Fubara ya faɗi hakan ne a Fatakwal, babban birnin Ribas, ranar Talata lokacin da ya karbi bakuncin ƴan kwamitin amintattu na PDP (BoT) a gidan gwamnatinsa.

Kara karanta wannan

Wani shugaban INEC ya yanke jiki ya faɗi, ya mutu bayan fitowa daga taro

Shugaban kwamitin amintattun PDP, Adolphus Wabara ne ya jagoranci mambobin BoT suka kai wa gwamnan ziyara, kamar yadda The Cable ta tattaro.

Da yake jawabi, Gwamna Fubara ya ce ziyarar BoT kaɗai ta isa ƙaryata masu yaɗa jita-jitar yana shirin jefar da jam'iyyar PDP.

Gwamna Fubara na shirin barin PDP?

Gwamna Fubara ya ce:

“Ina matuƙar gode muku da kuka dauki duk wata kasada kuka tako zuwa jihar Ribas domin ganin gwamna da magoya bayan jam’iyyarmu. Mu nan ƴaƴan PDP ne babu surki.

"Ina cikin farin ciki da na ganku tare da mu yau domin tattauna abin da ya shafi Ribas, ina tabbatar maku cewa zama darma a PDP,

"Maƙasuɗin wannan ziyarar daya ce: mecece matsalar, ta yaya aka fara, ko kuma in ce me ya kawo ta kuma ta yaya ta koma yadda take a yau? Zan muku bayani idan mun shiga ganawar sirri."

Kara karanta wannan

Ganduje ya yi maganar neman takarar shugaban ƙasa a 2027, ya zargi ƴan Kwankwasiyya

Shugaban BoT ya faɗi dalilin zuwansu Ribas

A nasa jawabin, Wabara ya bayyana cewa uwar PDP ta ƙasa ta damu da halin da jam'iyyar ta shiga a jihar Ribas, ya ƙara da cewa sun zo ne domin sasanci da haɗin kai.

Mu, shugabannin wannan jam’iyya, mun zo nan ne domin neman zaman lafiya da hadin kai a jam’iyyar PDP," in ji shugaban BoT, The Sun ta rahoto.

Gwamnatin Tinubu ta kafa kwamiti

A wani rahoton na daban gwamnatin tarayya ta rantsar da kwamitin mutum 10 wanda zai sa ido da tabbatar da an aiwatar da hukuncin ƴancin ƙananan hukumomi

Sakataren gwamnatin, George Akume, shi ne zai jagoranci kwamitin wanda ya ƙunshi ministoci, gwamnan CBN da gwamnonin jihohi.

Muhammad Malumfashi, babban edita a sashen Hausa na Legit ya duba labarin.

Asali: Legit.ng