Duk da Raguwar Arzikinsa, Dangote Ya Kare 2022 da Wata Babbar Nasara, Ya Ci Ribar N27.7bn a Watan Disamba

• Aliko Dangote ya kare 2022 da babbar riba yayin da ya lashe N27bn a watan Disamban shekarar da ta gabata
• Ribar da ya samu ta samo asali ne daga abin da kamfaninsa na siminta ya kawo da dai sauran hannayen jari
• A yanzu haka shine attajiri na 80 a duniya bayan da ya sauka daga na 76 a jerin attajiran na duniya a bara

Aliko Dangote na ci gaba da girbar riba a matsayinsa na attajirin da ya fi kowa kudi a Afrika.

Hamshakin attajirin ya zama na 80 a jerin masu kudin duniya, inda ya samu ribar $28.6m, kusan N27.7bn a watan Disamban da ta gabata, inji Bloomberg.

An ce attajirin ya samu wadannan kudade ne mafi akasari daga ribar da kamfaninsa na siminti ya samar a shekarar.

Kara karanta wannan

2022: Dangote da wani attajirin Najeriya sun shiga jerin attajiran duniya da suka yi asarar $1.4trn

A halin yanzu, kamfanin simitin Dangote na da darajar N261 kan kowane hannun jari, kuma ta nan attajirin ke samun kudade da yawa.

Dangote, dan asalin jihar Kano shi ke rike da kaso mai tsoka a hannun jarin kamfanin simintin Dangote tare da hannaye 27,642,637 ya zuwa Janairun 2022, inji rahotanni.

Dangote ya zama na 80 daga na 76 a jerin attajiran duniya

Duk da faduwarsa daga matsayi na 76 zuwa na 80, dukiyar Dangote ta kai $18.7bn, kadan ya hana ya iso attajirin Rasha, Alexei Mordashove.

Dangote dai kwandila ne a nahiyar Afrika, kuma kamfaninsa na samar da kayayyakin rayuwa na yau da kullum da yawa a duniya.

Kamfaninsa ne mafi girma wajen samar da siminti a nahiyar Afrika, inda ya samar da N1.38trn na kudin shiga a shekarar 2021.

Hakazalika, yana samar da sukari, mai, taki, taliya da sauran kayan masarufi da ake amfani dasu a Afrika.

Kara karanta wannan

Ashe babu dadi: Kasurgumin dan bindiga ya firgita, an rusa gidansa, an kashe yaransa 16

Matatar man Dangote za ta warkar da ciwon wahalar man fetur a Najeriya

Ana kyautata zaton cewa, matatar man Dangote za ta fara aiki a watan Yunin 2023, kuma za ta bunkasa matsayin Dangote babu shakka.

A cewar rahotanni, matatar man za ta samar da tan miliyan 10 na man fetur, ta hanyar samar da ganga 65,000 a kowacce rana.

Ana sa ran, wannan matata za ta kawo karshen wahala da karancin man fetur da ake fama dashi a Najeriya na tsawon lokaci.

A shekarar da ta gabata, Dangote da Adenuga sun yi asarar kudade, yayin da Abdulsamad Rabiu ya kwashi riba da karin arziki.

Asali: Legit.ng