Sata: Kotu Ta Ɗaure Tsohon Shugaban Wata Babbar Jami'ar Tarayya a Najeriya
- Wata kotun majistare da ke Ile-Ife, Jihar Osun a ranar Alhamis ta daure tsohon shugaban daliban Jami’ar Obafemi Awolowo da ke Ile-Ife, Oyekan Ibukun a gidan gyaran hali
- Hakan ya biyo bayan zarginsa da ake yi da yashe asusun kungiyar da ya shugabanta inda ya tura N720,0000 a watan Afirilun shekarar 2022, ga asusun bankinsa
- An samu bayani akan cewa Oyekan tsohon shugaban kungiyar ne kuma dalibi ne a fannin likitanci a 2017, sai dai an tube shi bayan ya dauki nauyin kai wa dalibai hari
Osun - A ranar Alhamis, wata kotun majistare da ke Ile-Ife cikin Jihar Osun ta daure wani tsohon shugaban daliban Jami’ar Obafemi Awolowo a gidan gyaran hali bisa zarginsa da sace kudade daga asusun kungiyar wacce yanzu take da sabon shugaba.
The Punch ta tattaro bayanai kan yadda Onyekan ya rike kujerar shugaban kungiyar sannan kuma dalibi ne na fannin likitanci a shekarar 2017, kuma an tsige shi daga kujerar bisa zarginsa da daukar nauyin wata kungiya wurin kai farmaki ga dalibai.
Asali: Facebook
A shekarar 2022, an zarge shi da kwashe N720,000 daga asusun kungiyar inda ya tura wani asusu mai suna Bello Oyekunle Azeez a ranar 8 ga watan Afirilun 2022, kamar yadda The Eagle Online ta ruwaito.
A wata takarda wacce wani banki ya tura, a ranar 12 ga watan Afirilun 2022, mai taken, ‘Bukatar bincike akan asusu mai lamba: 1012121930 - Obafemi Awolowo University Union, wacce shugabanta, Olayiwola Festus ya ke jagoranta.
Banki ya tabbatar da fitar N720,000 ta yanar gizo daga tsohon shugaban kungiyar mai suna Ibukun Oyediran Oyekan zuwa asusun Oyekunle na wani bankin.
Sakataren harkokin kudade na kungiyar ne ya fara samun bayani akan fitar kudin
A bangarensa, sakataren harkar kudaden kungiyar, Oluwasegun Abiola a wata takarda da ya saki a ranar Talata, ya ce:
“Yayin da na samu sakon fitar kudin, na yi kokarin sanar da Babban Sakataren kungiyar da Shugabanta akan cewa ko sun ga sakon, inda suka ce ba su gani ba.
“Bayan sanar da bayanai akan lamarin ne wasu masu fatan ganin bayan masu mukaman kungiyar da aka zaba suka fara kananun maganganu.
“A ranar Talata, 12 ga watan Afirilu, manajan bankin ya sanar da ni cewa wani Ibukun Oyekan (Dr. Ibk) ne ya fitar da kudin sannan ya bukaci in je bankin don samun rahoton bincikensu.”
A ranar Laraba, jami’an tsaron OAU suka kama Oyekan daga nan suka mika shi ga ofishin ‘yan sandan Moore don a ci gaba da bincike.
Ya kasa cika sharuddan belin, hakan yasa aka garkame shi
Bayan nan ne a ranar Alhamis aka tura shi kotu gaban alkalin majistaren, A. A. Ayeni na kotun Majistare ta 3 a Ile-Ife inda aka zarge shi da hada makircin sata da kuma yin satar.
An kulle Oyekan wanda ya ki amsa laifin da ake zarginsa da aikatawa a gidan gyaran halin Kosere da ke Ile-Ife bayan gaza cika sharuddan beli. Daga nan aka dage sauraron karar zuwa ranar 26 ga watan Afirilu.
Kakakin kungiyar daliban, Ogunperi Taofeek ya ce an bukaci kudin belin Dr. IBK N500,000, sai dai ya gaza biya, hakan yasa aka garkame shi a gidan yarin.
Katsinsa: Ɗan Shekara 22 Ya Sace Wa Dattijuwa Kuɗinta Na Garatuti Baki Daya, Ya Siya Mota Da Babur
A wani labarin, Yan sanda a Jihar Katsina, a ranar Litinin sun yi holen wani Aliyu Abdullahi mai shekaru 22, mazaunin Kasuwar Mata Street a Karamar Hukumar Funtua saboda damfarar wata tsohuwa.
Ya wawushe mata dukkan kudinta na garatuti ta hanyar amfani da katin ta na banki wato ATM inda ya siya mota da babur da kudin, Vanguard ta ruwaito.
An taba kama mayaudarin, wanda ya kware wurin damfarar mutane ta hanyar sauya musu katinsu na ATM a baya amma daga bisani ya fito daga gidan yari kuma ya cigaba da laifin, rahoton Vanguard.
Asali: Legit.ng
