Kwallo: Real Madrid ta lashe kofin gasar Laliga bayan azumin shekara biyu

Kungiyar kwallon kafa ta Real Madrid ta sake lashe kofin gasar kwallon kafa ta kasar Andolus, wacce aka fi sani da 'Spain', a karo na 34 bayan ta lallasa kungiyar Villareal a dare ranar Alhamis da ci 2 -1.

Dan wasa gaba na kungiyar Real Madrid, Karim Benzema, ya saka kwallo biyu a wasansu da Villareal, wanda ya basu nasarar bawa kungiyar Barcelona tazarar maki bakwai a teburin jerin kungiyoyin kwallon kafa na gasar Laliga.

Real Madrida ta samu nasarar kwace kofin Laliga daga hannun babbar abokiyar hamayyarta, kungiyar Barcelona wacce ke rike da kofin a kakannin wasa biyu da suka gabata.

A wani labarin wasan kwallon kafa da Legit.ng ta wallafa, kungiyar Tottenham da ke kasar Ingila ta samu nasara a kan Kungiyar Newcastle da ci 3-1.

Nasarar ta Tottenham, ita ce ta farko da Jose Mourinho ya dandana a gida a gasar Firimiya tun da ya fara horaswa a kasar Ingila.

DUBA WANNAN: 'Yanta mayakan Boko Haram 602: Sai da mu ka rantsar dasu kafin sakinsu - DHQ

Jose Mourinho ya doke Newcastle a gidanta na St James Park wannan karo bayan ya jarraba sa’arsa sau takwas bai dace ba a baya.

Kafin yanzu, Jose Mourinho ya gwabza da Newcastle da kungiyoyin Chelsea da Manchester United, amma duk bai taba samun maki uku a kan kungiyar ba.

“Su na wasa da kyau, sun san yadda ake kwallo, sun san yadda za su samu maki, su na da hadari ta wurare daban-daban.” Mourinho game da Tottenham.

Da aka yi wa kocin magana game da wannan nasara mai tarihi da ya samu, ya bayyana cewa ba a jiya ne ya fara doke Newcasle a gida ba, ya yi hakan a lokacin da ya ke Chelsea.

Jose Mourinho ya tabbatar da cewa ya taba cin wasanni biyu a filin St James Park a wasan karamin kofi.

An yi haka a watan Nuwamban shekarar 2004, an kuma maimaita a Disamban shekarar 2006.

Sai dai, a ranar Laraba, 15 ga watan Yuli ne Mourinho ya fara samun sa’a a kan Newcastle a gidanta a gasar Firimiya.

Tsohon kocin na Real Madrid da Inter Milan ya yi amfani da wannan dama ta jiya, ya yabawa tsohon mai gidansa, Bobby Robson wanda ya daura shi a kan hanya.

Kocin ya yi aiki da Bobby Robson a matsayin tafinta a Porto da Sporting Lisbon kafin ya zama mataimakin mai horaswa, daga nan ne tauraruwarsa ta rika haskawa.

Domin sauke manhajar labaran Legit.ng a wayar ku ta hannu, latsa wannan rubutu na kasa:

https://play.google.com/store/apps/details?id=com.naij.hausa

Ku biyo mu a shafukanmu na dandalin sada zumunta:

Facebook: https://facebook.com/legitnghausa

Twitter: https://twitter.com/legitnghausa

Idan kuna da wata shawara ko bukatar bamu labari,

Tuntube mu a: labaranhausa@corp.legit.ng

Asali: Legit.ng