Matawalle ya nada madadin marigayi Sarkin Kauran Namoda

Matawalle ya nada madadin marigayi Sarkin Kauran Namoda

Bello Mohammed Matawallen Maradun, gwamnan jihar Zamfara, ya nada Alhaji Sanusi Mohammed a matsayin sabon sarkin masarautar Kauran Namoda.

Hakan na kunshe ne a cikin sanarwar da Zailani Baffa, kakakin gwamnan jihar Zamfara, ya fitar da yammacin ranar Laraba.

Ya ce gwamnan ya zabi Mohammed a matsayin sabon sarki bisa shawarar ma su ruwa da tsaki a nadin sabon sarki a masarautar Kauran Namoda.

Sabon sarkin ya maye gurbin tsohon sarki Alhaji Mohammed Ahmed Asha wanda Allah ya yi wa rasuwa ranar Lahadi, 03 ga watan Mayu, 2020.

Kafin nadinsa a matsayin sabon sarki, Mohammed, mai shekaru 40 a duniya, manjo ne a rundunar sojin Najeriya.

Mohammed da ne wurin marigayi Asha, kuma shi ne sarkin yanka na biyu a tsarin sarki mai sanda a masarautar, amma ku ma sarki na 16 a tsarin masarautar Kiyawan Kauran Namoda.

Matawalle ya nada madadin marigayi Sarkin Kauran Namoda

Sabon Sarkin Kauran Namoda; Alhaji Sanusi Mohammed Hoto: BBC
Source: UGC

Da safiyar ranar Lahadi ne Legit.ng ta wallafa labarin mutuwar Sarkin masarautar Kauran Namoda a jihar Zamfara, Alhaji Muhammad Ahmad Asha.

Sarkin ya rasu ne da safiyar ranar Lahadi, 3 ga watan Mayun 2020 bayan fama da gajeriyar rashin lafiya kamar yadda wani na kusa da fadar sarkin ya tabbatar wa BBC.

DUBA WANNAN: Ganduje ya nada Kabiru Inuwa a matsayin sabon sarkin masarautar Rano

Ya rasu yana da shekaru 71 a duniya, ya kuma bar mata uku da yaya da dama.

A cewar jaridar The Punch, Sarkin ya mutu ne a asibitin da aka killace shi.

Jaridar ta ce ya ana zargin cewa cutar covid-19 ce ta yi sanadin mutuwarsa.

The Punch ta ce sakataren yada labarai na kwamitin yaki da cutar covid-19 a jihar Zamfara, Mustafa Jafaru, ya ce basaraken ya na killace ne a asibitin kwararru da ke garin Gusau, babban birnin jiha.

Jafaru ya bayyana cewa an dauki jininsa tare da aika shi zuwa dakin gwaji a Abuja, amma har ya zuwa yanzu sakamakon gwajin bai fito ba.

Tsohon gwamnan jihar Zamfara, Sani Yariman Bakura, ne ya nada marigayin a matsayin sarki mai sanda na masarautar Kauran Namoda a shekarar 2004.

Muhimmiyar sanarwa: Shafin NAIJ.com Hausa ya koma LEGIT.ng Hausa. Mun gode da kasancewarku tare da mu.

Domin sauke manhajar labaran Legit.ng a wayar ku ta hannu, latsa wannan rubutu na kasa:

https://play.google.com/store/apps/details?id=com.naij.hausa

Ku biyo mu a shafukanmu na dandalin sada zumunta:

Facebook: https://facebook.com/legitnghausa

Twitter: https://twitter.com/legitnghausa

Idan kuna da wata shawara ko bukatar bamu labari,

Tuntube mu a: labaranhausa@corp.legit.ng

Source: Legit

Online view pixel