Sheikh Dahiru Bauchi ya ce a daina musafaha saboda coronavirus
Babban malamin addinin musulunci kuma shugaban mabiya Darikar Tijjaniyya a Najeriya, Sheikh Dahiru Usman Bauchi, ya bukaci jama’ar kasar da su bi umurnin likitoci su daina musafaha a tsakaninsu domin guje wa kamuwa da cutar Coronavirus.
Shehin malamin ya bayyana hakan ne bayan sanarwar da suka fitar na soke taron maulidin Sheikh Ibrahim Nyass da za a yi a Abuja da Sokoto sakamakon yaduwar cutar ta Coronavirus.
Dahiru Bauchi ya bayyana cewa an jingine taron maulidin ne domin yadda annobar ke yaduwa a makwabtan Najeriya sannan kuma cewa taron ba na yan Najeriya kadai bane.
Asali: Twitter
Ya ce mutane daga kasashen duniya kan shigo domin halartan taron maulidin amma yanzu babu hali don an rufe filayen jiragen sama tare da hana taron jama’a a wasu kasashen.
Ya jadadda cewa sai lokacin da annobar ta kau sannan za a gudanar da taron.
KU KARANTA KUMA: Gwamnatin Legas ta hana sallar Juma’a na tsawon makonni 4 saboda Corona
Da farko dai mun ji cewa Khalifa Shehu Ahmad Tijjani Inyass ya bada sanarwar cewa an dage taron maulidi Shehu Ibrahim Inyass wanda kungiyar Majm'ul Ahbabu Shehu Ibrahim za ta shirya a garin Sokoto.
Sanarwar ta fito ne daga bakin mai magana da yawun Faila Maulana Sheikh Mahi Cisse a cikin wani dan gajeren sakon murya.
A cikin jawabin Sheikh Mahi Cisse, ya bayyana cewa Khalifa Shehu Tijjani Inyass ya bada izinin dage taron ne saboda barkewar cutar coronavirus wacce ta addabi al'ummar duniya baki daya.
Ya kara da kira ga kungiyar a kan ta gaggauta dakatar da dukkan shirye-shiryen maulidin nata.
A wani labarin kuma, mun ji cewa Kwamitin shugaban kasa dake yaki da yaduwar cutar Coronavirus ta kafa wata karamar kwamiti wanda za ta tattauna da shuwagabannin addinai daga bangarorin addinin Musulunci da kuma Kiristanci don duba yiwuwar kulle wuraren ibadu.
Ministan watsa labaru, Lai Muhammad ne ya bayyana haka yayin da yake bayar da jawabi game da shirye shiryen kwamitin a gidan talabijin na NTA, inda yace ba kai tsaye gwamnati za ta rufe wuraren ibada ba, har sai ta samu goyon bayan shuwagabannin addinai.
Idan ku na da wata shawara ko bukatar bamu labari, tuntube mu a: labaranhausa@corp.legit.ng
Latsa wannan domin samun sabuwar manhajar labarai ta Legit.ng Hausa a wayar ku ta hannu: https://play.google.com/store/apps/details?id=com.naij.hausa&hl=en
Ku biyo mu a shafukanmu na dandalin sada zumunta:
Facebook: https://facebook.com/legitnghausa
Twitter: https://twitter.com/legitnghausa
Muhimmiyar sanarwa: Shafin NAIJ.com Hausa ya koma LEGIT.ng Hausa. Mun gode da kasancewa tare da mu.
Asali: Legit.ng
