An rufe babbar gadar Lagas

Gwamnatin jihar Lagas ta ce za ta rufe babbar gadar nan mai muhimmanci da ta hada tsibirin Lagas da sauran unguwannin birnin domin binciken ko gadar na bukatar gyara.

Gadar wadda ake kira third Mainaland Bridge za a rufe ta ne na tsawon kwana hudu kamar yadda gwamnati ta yi alkawali.

Kwamishinan ayyuka na jihar Ade Akinsanya ya ce an tanadi jami'an kula da zirga-zirga a sauran hanyoyi domin saukaka wa cunkoso a birnin.

Gadar mai tsawon kusan kilomita 12 an kaddamar da ita ne a shekarar 1990, lokacin mulkin tsohon shugaban kasa a mulkin soja, Janar Ibrahim Basamasi Babangida.

Ana kallon gadar a matsayin mai matukar muhimmanci a jihar wacce akewa lakabi da cibiyar kasuwancin Najeriya.

KU KARANTA KUMA: Muna bukatar Buhari ya sake kera tattalin aziki – Tinubu

Matakin dai zai haifar da cushewar motoci a sauran hanyoyin da ma'aikata da 'yan kasuwa za su bi domin isa cikin birnin jihar.

Cushewar hanyoyin kuma zai fi shafi ma'aikata da 'yan kasuwa musamman lura da gadar ita hanya mafi sauki ta shiga birnin.

Idan ka na da wata shawara ko bukatar ba mu labari, a tuntube mu a labaranhausa@corp.legit.ng

Ku same mu a https://www.facebook.com/naijcomhausa

Ko a http://twitter.com/naijcomhausa

Latsa wannan domin samun sabuwar manhajar labarai ta Legit.ng Hausa a wayar ku ta hannu: https://play.google.com/store/apps/details?id=com.naij.hausa&hl=en

Asali: Legit.ng