Ruwa ba sa’an Kwando ba: Daliban Kaduna sun lallasa na kasar Amurka a gasar Duniya

Gwamnan jihar Kaduna, Malam Nasir Ahmad El-Rufai ya danganta nasarar da daliban jihar Kaduna suka samu a gasar muhawar ta Duniya daya gudana a kasar Czech Republic a matsayin wata manuniya dake tabbatar da ingancin sauyin da gwamnatinsa ta kawo a shan’anin ilimi a jihar.

Daliban na jihar Kaduna sun sha gaban daliban kasar Amurka, Bulgaria, Slovenia da na kasar Slovakia, bayan sun sha karakaina a zagaye na kusa da karshe, inda suka daga martabar Najeriya ta zo na biyu a wannan gasa.

KU KARANTA: Maganganun da Kwankwao ya fada ma Buhari gaba da gaba a fadar shugaban kasa

Jaridar Leadership ta ruwaito a yayin da gwamnan ya karbi bakoncin tawagar daliban a fadar gwamnatin jihar Kaduna yayi alkawarin gwamnati zata dauki nauyin karatunsu su shida gaba daya, sa’annan ya mika musu kyautar naira miliyan daya.

Cikin wata sanarwa da Kaakakin gwamnan, Samuel Aruwan ya fitar, ya bayyana manufar gwamna El-Rufai na cigaba da kokarin bayar da ingantaccen ilimi ga matasan jihar Kaduna, musamman duba da cewa dalibai biyar daga cikin tawagar dalibai ne a makaratun gwamnati.

Majiyar Legit.ng ta ruwaito sunayen daliban da makarantun da suka fito kamar haka; Mary Manuel Bawa, makarantar sakandari dake titin Independence Kaduna, Shuaibu Nura daga Alhudahuda Zaria, Auwal Abubakar daga makarantar Sakandari ta Kofar Kibo Zaria.

Sauran sun hada da Hauwa Mustapha daga makarantar sakandari ta Kofar Gaya Zaria, Joy Victor daga makarantar sakandarin cocin ECWA Kaduna sai Nathaniel Adamu daga sakandarin St John Kachia, daga karshe gwamnan ya yi alkawarin zai shirya ma daliban liyafar cin abinci don karramasu.

Ku biyo mu a https://www.facebook.com/naijcomhausa

ko a http://twitter.com/naijcomhausa

Ga masu shawara ko korafi, a same mu a labaranhausa@corp.legit.ng

Asali: Legit.ng