Da dumi dumi: Shugaban kwamitin yaki da Coronavirus a Kano ya kamu da cutar

Da dumi dumi: Shugaban kwamitin yaki da Coronavirus a Kano ya kamu da cutar

Shugaban kwamitin ko ta kwana dake yaki da yaduwar annobar cutar COVID-19 a jahar Kano, Farfesa Abdulrazak Habib ya kamu da cutar COVID-19, watau Coronavirus.

Farfesa Habib na daga cikin mutane 12 da hukumar kare yaduwar cututtuka ta kasa, NCDC, ta fitar da sakamakon gwajin da ta musu a ranar Laraba, 16 ga watan Afrilu, inji rahoton Vanguard.

KU KARANTA: Coronavirus: WHO ta nemi kasashen duniya su cika sharudda 7 kafin su janye takunkumi

Wata majiya ta tabbatar da lamarin, inda ta ce: “Da gaske ne, kuma abin takaici, Farfesa Habib ya kamu da COVID-19, a yanzu haka an kwantar da shi a cibiyar killacewa dake Kwanar Dawaki.”

Farfesa Habib kwararren likita ne da ya goge a kan sha’anin cututtuka masu yaduwa, kuma shi ne shugaba na biyu a kwamitin yaki da COVID-19 ta jahar Kano da Gwamna Ganduje ya kafa.

Da dumi dumi: Shugaban kwamitin yaki da Coronavirus a Kano ya kamu da cutar

Ma'aikatan NCDC
Source: Twitter

Wani babban memba a kwamitin ya bayyana cewa Farfesan ya kamu da cutar ne yayin da yake kulawa da wasu daga marasa lafiya dake dauke da cutar ta Coronavirus a jahar Kano.

Kazalika Farfesan babban malami ne a jami’ar Bayero, inda yake koyar da yadda za’a iya sarrafa garkuwan jikin dan Adam domin yaki da cututtuka kamarsu sida, cizon maciji da sauransu.

Duk kokarin da majiyarmu ta yi na jin ta bakin kwamishinan kiwon lafiya na Kano, Aminu Ibrahim Tsanyawa game da lamarin ya ci tura sakamakon bai amsa sakon da ta tura masa ba.

A ranar 21 ga watan Maris ne Ganduje ya nada kwamitin a karkashin jagorancin mataimakin gwamna Nasiru Yusuf da Farfesa Habib da nufin su dakile yaduwar cutar Covid-19 a Kano.

Ita dai cutar Coronavirus na bukatar matakan kandagarki ne a yanzu sakamakon ba ta da magani, sai dai kuma ana iya kara karfin garkuwan jiki domin yaki da cutar idan ta shiga jiki.

Kamar yadda yan Hausa ke fadi idan kana da kyau sai ka kara da wanka, ga wasu daga cikin hanyoyin karfafa garkuwan jiki domin yaki da cututtuka yayin da suka shiga jikin dan Adam;

- Kauce ma shan taba da sauran kayan hayaki

- Cin abinci mai kayan ganye

- Motsa jiki a kai a kai

- Rage kiban da ya wuce hankali

- Samun isashshen barci

- Tabbatar da tsaftar jiki da gabbai

- Rage damuwa a rai

Ku biyo mu a https://facebook.com/legitnghausa

ko a http://twitter.com/legitnghausa

KU LATSA: Hanyar sauko da sabuwar manhajar jaridar Legit.com Hausa cikin sauki

Ga masu shawara ko korafi, a same mu a labaranhausa@corp.legit.com

Sanarwa na musamman: Shafin NAIJ Hausa ya koma Legit Hausa

Source: Legit

Mailfire view pixel