Saura Kwana 4 Zabe, Gwamna Buni Ya Dage Tsohuwar Dokar Hana Hawa Babura a Jihar Yobe

• Gwamnatin Yobe ta dage takunkumin da aka sanya kan amfani da babura a wasu kananan hukumomi bakwai na jihar
• Bayan dage haramcin, gwamnatin jihar ta ce ba za a yi achaba ba kuma mutum daya aka yarda ya hau kowani babur daya
• Tun a gwamnatin Ibrahim Gaidam aka sanya wannan takunkumi a kananan hukumomi 17 amma Buni ya sauke na 10 suka rage 7

Yobe - Gwamna Mai-Mala Buni na jihar Yobe ya dage haramci kan amfani da babura a kananan hukumomi bakwai na jihar.

Hakan na kunshe ne a cikin wata sanarwa dauke da sa hannun mai ba Buni shawara kan harkokin tsaro, Birgediya Janar Dahiru Abdulsalam mai ritaya, Daily Trust ta rahoto.

Jaridar Independent ta nakalto sanarwar na cewa:

"Saboda haka an dage haramci kan babura a Bursari, Damaturu, Geidam, Gujba, Gulani, Tarmuwa daYunusari daga ranar 6 ga watan Maris.

Kara karanta wannan

Daga karshe: Kotu ba da belin dan majalisar Kano Doguwa, an ba shi sharadi kan zaben gwamnoni

"An dage haramcin ne saboda yanayi, masu babura za su dunga aiki tsakanin 6:00 na safe zuwa 6:00 na yamma a kullun.

"Ba za a dunga yin achaba da babura ba. Ba za a dunga daukar fasinjoji a babura ba.

"Mutum daya kacal aka yarda ya hau babur ba tare da wani mutum a kai ba.

"Ya zamana mai tuka babur din na da cikakken rijista, lasisi da takardun dukkanin babura a kananan hukumomin da abun ya shafa.

"Gwamnatin jihar ta kuma yi umurnin cewa masu babura su dunga aiki a tsakanin kananan hukumominsu kawai.

"Ba za a yi zarya tsakannin kananan hukumomi ba. Duk wanda aka samu ya karya dokar za a yanke masa hukuncin da ya dace.

"An bukaci dukkanin hukumomin tsaro da su lura sannan su tabbatar da ganin an bi doka yadda ya dace."

An sanya dokar hana babura a Yobe shekaru 11 da suka shige

Kara karanta wannan

Saura kwana 4 zabe, kotu ya fadi wanda ya amince ya yi takarar gwamnan Zamfara a PDP

Ku tuna cewa a watan Janairun 2012, gwamnan jihar Yobe na wancan lokacin, Ibrahim Gaidam ya haramta achaba da nufin hana jama'a amfani da shi wajen haddasa rashin tsaro musamman a lokacin rikicin Boko Haram a jihar.

Sai dai kuma Gwamna mai ci, Mai Mala Buni ya dage haramcin a kananan hukumoni 10 cikin 17 na jihar a watan Janairun 2022.

A wani labari na daban, mun ji cewa tsagerun yan bindiga sun farmaki hedkwatar karamar hukumar Maru ta jihar Zamfara inda suka kashe DPO dfa wasu jami'an tsaro biyu.

Asali: Legit.ng