‘Yan bindiga sun sa 'yan gari su tara masu kudi nan da Juma’a ko a kawo masu hare-hare
- ‘Yan bindiga sun daura harajin dole a kan wasu kauyuka da ke jihar Sokoto
- An addabi Attalawa, Danmaliki, Adamawa, Dukkuma, Sardauna da Dangari
- Mutane na biyan kudin ko su bar gari saboda su gujewa harin ‘yan bindiga
Sokoto - ‘Yan bindigan da suka addabi yankin gabashin jihar Sokoto sun sa haraji a kan mutanen kauye, sun bukaci a kawo masu kudi, ko a kawo masu hari.
Wani rahoto da Daily Trust ta fitar, ya nuna an ba mazauna yankin nan da ranar Juma’a, 29 ga watan Oktoba, 2021, su biya wadannan kudi da aka bukata.
‘Yan bindigan sun hana mutanen kauyuka shiga gonakinsu, har sai sun tara masu wadannan kudin.
Wani mazaunin yankin ya shaidawa manema labarai cewa wasu sun fara biyan kudin da aka sa masu, wasu kuma suna bakin kokari kafin wa’adin ya cika.
Sahara Reporters tace ‘yan bindigan suna la’akari da girman kauye wajen yankawa al’umma harajin na su.
Asali: Facebook
Kauyukan da ‘yan bindiga suka addaba
“An ce wasu su biya N400, 000, wasu kuma za su biya N700, 000, wasu kuma za su biya abin da bai kai haka ba. Ya ragewa mutane su san yadda za su yi.”
“A wasu kauyukan, an ce masu gida su kawo N2, 000, matasan da ba su da aure sai su biya N1, 000.” – Majiya.
‘Yan bindigan sun bukaci a hada masu N400, 000 a kauyukan Attalawa, Danmaliki, Adamawa, Dukkuma, Sardauna da Dangari, za a biya kudin nan da Juma’a.
Babu yadda aka iya – ‘Dan Majalisan Sokoto
‘Dan majalisar dokokin jiha mai wakiltar mazabar Sabon Birni ta Arewa, Hon. Aminu Almustapha Gobir yace ana kai masu hari saboda sun ki biyan kudin.
“Mutane sun gwammace su biya kudin su zauna lafiya a kauyukansu, da su dogara da jami’an tsaro, ko kuma su tsere daga yankin.” – Hon. Aminu Gobir
Duk da haka akwai lokutan da aka biya kudin, kuma hakan bai hana ‘yan bindiga su kawo hari ba.
Yaudarar Igboho aka yi - Adeyeye Ogunwusi Ojajaya
Kwanan nan ne Ooni na kasar Ife, Adeyeye Ogunwusi Ojajaya fito ya yi magana game da Sunday Igboho, yace wasu ‘Yan siyasa ne suka kai shi, suka baro shi.
Yanzu Igboho ya shiga hannu amma duk da haka Adeyeye Ogunwusi Ojaja II yace sun yafe masa, kuma suna kokarin ceto shi daga inda yake tsare a kasar Benin.
Asali: Legit.ng
