Shugaban hukumar NIS ya garagadi ma su neman aiki, ya yi karin bayani a kan hanyar daukan aiki

Hukumar kula da shige da fice ta kasa (NIS) ta gargadi ma su neman aiki da ita a kan su gujewa fadawa hannun 'yan damfara da ke neman kudi a hannunsu da sunan za su sama mu su aiki a hukumar.

Shugaban hukumar NIS na kasa, Muhammad Babandede, ne ya bayar da wannan sanarwa a cikin wani jawabi da ya fitar ranar Talata a Abuja.

Babandede ya fitar da jawabin ne a matsayin martani a kan wani adireshin yanar gizo da ke yawo a dandalin sada zumunta da sunan na daukan aiki ne a hukumar NIS.

"Aiki ne na 'yan damfara da ke son cutar jama'a, su rabasu da 'yan kudinsu da su ka sha wahalar nema.

"Mun sha yin gargadi a baya kuma har yanzu ba zamu daina ba; jama'a su kauracewa duk wani sako ko sanarwar da ba a shafin yanar gizo da dandalin sada zumunta na hukumar NIS aka wallafa ba.

DUBA WANNAN: 'Yan sanda sun kama 'yan bindigar da su ka kashe Dakta Audu bayan karbar N7.5m kudin fansa

"Ba a nema balle har a karbi kudin wani mai neman aiki da sunan za a taimake shi, ku gaggauta sanar da ofishin 'yan sanda ma fi kusa a duk lokacin da wani ma'aikacin hukumar NIS ko wani mutum ya nemi ku bashi kudi domin ya taimaka mu ku wajen samun aiki a NIS," a cewar Babandede.

Babandede ya kara da cewa hukumar NIS za ta yi amfani da sahihan jaridu da kafafen yada labarai domin isar da sako ga jama'a a kan hanyoyi da matakan samun aiki a hukumar idan bukatar hakan ta taso.

Domin sauke manhajar labaran Legit.ng a wayar ku ta hannu, latsa wannan rubutu na kasa:

https://play.google.com/store/apps/details?id=com.naij.hausa

Ku biyo mu a shafukanmu na dandalin sada zumunta:

Facebook: https://facebook.com/legitnghausa

Twitter: https://twitter.com/legitnghausa

Idan kuna da wata shawara ko bukatar bamu labari,

Tuntube mu a: labaranhausa@corp.legit.ng

Asali: Legit.ng