Da dumi dumi: Rundunar Sojin Najeriya ta fatattaki hukumar majalisar dinkin duniya daga Borno

Da dumi dumi: Rundunar Sojin Najeriya ta fatattaki hukumar majalisar dinkin duniya daga Borno

Hukumar Sojin Najeriya ta sanar da dakatar da duk wasu ayyukan jin kai da wata hukumar majalisar dinkin duniya dake kula da kanan yara, UNICEF takeyi a jahar Borno, dama sauran yankunan Arewa maso gabas gaba daya.

Jaridar PR Nigeria ta ruwaito mataimakin daraktan watsa labaru na rundunar Sojin Najeriya, Kanal Onyeama Nwachukwu ne ya sanar da haka a ranar Juma’a 14 ga watan Disamba, inda yace sun dauki wannan mataki ne duba da yadda UNICEF ta ke yi ma yaki da yan ta’adda zagon kasa.

KU KARANTA: Wanda bai ji bari ba: Wani matashin dan luwadi ya gamu da fushin Alkalin babbar kotu

Sojoji sun zargin UNICEF da kokarin cin dunduniyarsu a yakin da suke yi da kungiyar ta’addanci ta Boko Haram, inda suka ce UNICEF da wasu kungiyoyi masu zaman kansu dake rajin tallafa ma yan gudun hijira suna horas da matasa akan dabarun yaki.

Da dumi dumi: Rundunar Sojin Najeriya ta fatattaki hukumar majalisar dinkin duniya daga Borno

Sojoji
Source: Depositphotos

Majiyar Legit.com ta ruwaito wadannan ayyukan kungiyoyi da ma wasu na daban yasa rundunar ta daukesu a matsayin abokan gaba dake kokarin mayar da hannun agogo baya, sa’annan ta bayyana ayyukansu a matsayin raninin hakulan yan Najeriya.

“Da wannan ne muke sanar da dakatar da ayyukan UNICEF a yankin Arewa maso gabas tunda dai sun yi watsi da aikin dake gabansu na kulawa da kananan yara marasa galihu dake gudun hijira a sansanoni daban daban a fadin yankin, sun fara shirya wasu kulle kulle.

“A yanzu UNICEF tana yi ma yaki da ta’addanci zagon kasa ta hanyar yada jita jitan cin zarafin daga bangaren Sojoji, haka zalika suna horas da yan ta’adda akan dabarun yaki, kuma suna biyan masu yi ma kungiyar Boko Haram leken asiri.

“Mun samu labarin UNICEF ta horas da yan ta’addan ne daga ranar 12 ga watan Disamba na 2018 zuwa 13 ga watan Disamba a dakin taro na ma’aikatan kudi na jahar Borno dake garin Maiduguri, kuma ba zamu lamunci hakan ba.” Inji sanarwar.

Sai dai wasu masana doka suna ganin ba lallai bane wannan hukunci na rundunar Soji yayi tasiri saboda a cewarsu Sojojin basu da ikon daukan wannan hukunci, shugaban kasa Muhammadu Buhari ne kadai zai iya zartar da wannan hukunci, amma zuwa yanzu babu tabbacin shi ya bada umarnin ko a’a.

Ku biyo mu a https://facebook.com/legitnghausa

ko a http://twitter.com/legitcomhausa

Ga masu shawara ko korafi, a same mu a labaranhausa@corp.legit.com

Sanarwa na musamman: Shafin NAIJ Hausa ya koma Legit Hausa

Source: Legit

Mailfire view pixel